ਚੰਡੀਗੜ੍ਹ ਪੰਜਾਬ ਯੂਨੀਵਰਸਿਟੀ ਵਿਖੇ ਪੋਸਟਰ ਅਤੇ ਕਿਤਾਬ ਨੁਮਾਇਸ਼ ਆਯੋਜਿਤ

ਪੰਜਾਬ ਸਟੂਡੈਂਟਸ ਯੂਨੀਅਨ(ਲਲਕਾਰ) ਵੱਲੋਂ ਅਦਾਰਾ ਜਨਚੇਤਨਾ ਦੇ ਸਹਿਯੋਗ ਨਾਲ਼ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੇ ਸਟੂਡੈਂਟ ਸੈਂਟਰ ਵਿਖੇ ਪੋਸਟਰ ਅਤੇ ਕਿਤਾਬ ਨੁਮਾਇਸ਼ ਲਗਾਈ ਗਈ। ਕਵਿਤਾਵਾਂ, ਟੂਕਾਂ, ਅਤੇ ਪੇਂਟਿੰਗਾਂ ਦੇ ਪੋਸਟਰ ਅਤੇ ਵਿਸ਼ਵ ਕਲਾਸਿਕ ਸਾਹਿਤ, ਕਵਿਤਾ, ਪੰਜਾਬੀ ਇਤਿਹਾਸ, ਅਤੇ ਇਨਕਲਾਬੀ ਲਹਿਰ ਦੇ ਯੋਧਿਆਂ ਦੀਆਂ ਰਚਨਾਵਾਂ ਨਾਲ਼ ਇਸ ਨੁਮਾਇਸ਼ ਨੇ ਵਿਦਿਆਰਥੀਆਂ ਦਾ ਧਿਆਨ ਖਿੱਚਿਆ। ਯੂਨੀਵਰਸਿਟੀਆਂ ਅਤੇ ਵਿੱਦਿਅਕ ਅਦਾਰਿਆਂ ਨੂੰ ਲਗਾਤਾਰ ਘਟਦੇ ਸਰਕਾਰੀ ਫੰਡ ਸਦਕਾ ਅੱਜ ਬੌਧਿਕ ਸੰਕਟ ਵਿੱਚੋਂ ਗੁਜਰਨਾ ਪੈ ਰਿਹਾ ਹੈ। ਪ੍ਰਸ਼ਾਸਨ ਅਤੇ ਵਿਦਿਆਰਥੀ ਕੌਂਸਲ ਦਾ ਜੋਰ ਫੈਸਤਾਂ ਉੱਤੇ ਲੱਖਾਂ ਖਰਚ ਕੇ ਕੈਂਪਸ ਨੂੰ ਇੱਕ ਸ਼ੌਪਿੰਗ ਮਾਲ ਬਣਾਉਣ ਉੱਤੇ ਰਹਿੰਦਾ ਹੈ, ਪਰ ਯੂਨੀਵਰਸਿਟੀ ਵਿੱਚ ਹੋਂੜੀ ਖੋਜ ਅਤੇ ਬੌਧਿਕ ਸਰਗਰਮੀ ਲਈ ਪ੍ਰਸ਼ਾਸਨ ਨੂੰ ਕੋਈ ਚਿੰਤਾ ਨਹੀਂ। ਵਿਦਿਆਰਥੀਆਂ ਲਈ ਸਿੱਖਿਆ ਦਾ ਮਤਲਬ ਸਿਰਫ ਟੈਸਟ, ਪ੍ਰੀਖਿਆ, ਅਤੇ ਹਾਜਰੀ ਪੂਰੀ ਕਰਨ ਤੱਕ ਸੀਮਤ ਕਰ ਦਿੱਤਾ ਜਾਂਦਾ ਹੈ। ਇਸ ਤਰ੍ਹਾਂ ਅੱਜ ਦਾ ਢਾਂਚਾ ਸਿੱਖਿਆ ਰਾਹੀਂ ਨਵੀਂ ਪੀੜ੍ਹੀ ਨੂੰ ਅਗਾਂਹਵਧੂ ਵਿਚਾਰਾਂ, ਤਰਕਸ਼ੀਲਤਾ, ਅਤੇ ਇਨਕਲਾਬੀ ਵਿਰਾਸਤ ਤੋਂ ਦੂਰ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਅਜਿਹੇ ਸਮਿਆਂ ਵਿੱਚ ਇਸਦਾ ਵਿਰੋਧ ਕਰਨਾ ਲਾਜਮੀ ਬਣ ਜਾਂਦਾ ਹੈ। ਪੰਜਾਬ ਸਟੂਡੈਂਟਸ ਯੂਨੀਅਨ (ਲਲਕਾਰ) ਇਸ ਮਾਹੌਲ ਨੂੰ ਬਦਲਣ ਲਈ ਅਤੇ ਵਿਦਿਆਰਥੀਆਂ ਨੂੰ ਇਨਕਲਾਬੀ ਸਿਆਸਤ ਅਤੇ ਵਿਚਾਰਾਂ ਨਾਲ਼ ਜੋੜਨ ਲਈ ਅਜਿਹੇ ਉਪਰਾਲੇ ਲਗਾਤਾਰ ਕਰਦੀ ਹੈ। ਵਿਦਿਆਰਥੀਆਂ ਵੱਲੋਂ ਵੀ ਕੈਂਪਸ ਵਿਚ ਇਸਦੀ ਘਾਟ ਮਹਿਸੂਸ ਕੀਤੀ ਜਾਂਦੀ ਹੈ, ਜਿਸ ਕਰਕੇ ਉਹਨਾਂ ਨੂੰ ਅਜਿਹੀਆਂ ਕਿਤਾਬਾਂ ਅਤੇ ਪੋਸਟਰ ਚੰਗੇ ਲਗਦੇ ਹਨ। ਨੁਮਾਇਸ਼ ਵਿਖੇ ਵਿਦਿਆਰਥੀਆਂ ਨਾਲ਼ ਗੱਲਬਾਤ ਦੌਰਾਨ ਉਹਨਾਂ ਨੇ ਯੂਨੀਵਰਸਿਟੀ ਦੇ ਡਿੱਗਦੇ ਬੌਧਿਕ ਪੱਧਰ ਬਾਰੇ ਗੱਲ ਕੀਤੀ ਅਤੇ ਜਥੇਬੰਦੀ ਦੇ ਇਸ ਉਪਰਾਲੇ ਨੂੰ ਸਹਰਾਇਆ। ਵਿਦਿਆਰਥੀਆਂ ਨੇ  ਭਗਤ ਸਿੰਘ ਦੀਆਂ ਲਿਖਤਾਂ ਦੀ ਕਿਤਾਬ 'ਇਨਕਲਾਬ ਦਾ ਸੁਨੇਹਾ', ਇਨਕਲਾਬੀ ਕਵੀ ਪਾਸ਼ ਦੀਆਂ ਕਵਿਤਾਵਾਂ, ਮੈਕਸਿਮ ਗੋਰਕੀ ਦੇ ਨਾਵਲ ਅਤੇ ਹਿੰਦੀ ਕਹਾਣੀਆਂ ਕਾਫੀ ਪਸੰਦ ਕੀਤੀਆਂ। ਪੀਐੱਸਯੂ (ਲਲਕਾਰ) ਲਗਾਤਾਰ ਇਨਕਲਾਬੀ ਵਿਦਿਆਰਥੀ ਸਿਆਸਤ ਵਿਚ ਵਿਦਿਆਰਥੀਆਂ ਨੂੰ ਲਾਮਬੰਦ ਕਰਨ ਲਈ ਵਿੱਦਿਅਕ ਅਦਾਰਿਆਂ ਵਿੱਚ ਅਜਿਹੇ ਪ੍ਰੋਗਰਾਮਾਂ ਰਾਹੀਂ ਅਗਾਂਹਵਧੂ ਵਿਚਾਰਾਂ ਨੂੰ ਵਿਦਿਆਰਥੀਆਂ ਤੱਕ ਲੈਜਾਣ ਦਾ ਕੰਮ ਕਰਦੀ ਰਹੇਗੀ।