ਕੁਦਰਤੀ ਖੇਤੀ ਰਾਹੀਂ ਛੋਲਿਆਂ ਦੀ ਪੈਦਾਵਾਰ ਕਰ ਕੇ ਹੋਇਆ ਮਾਲਾਮਾਲ,  ਲਲਿਤ ਕਾਲੀਆ ਦੂਜਿਆਂ ਲਈ ਬਣਿਆ ਮਿਸਾਲ

ਹਮੀਰਪੁਰ (ਹਿ.ਸ.)। ਕੁਦਰਤੀ ਖੇਤੀ ‘ਚ ਸ਼ਲਾਘਾਯੋਗ ਕੰਮ ਕਰ ਰਹੇ ਹਮੀਰਪੁਰ ਨੇੜਲੇ ਪਿੰਡ ਹਰਣੇੜ ਦੇ ਲਲਿਤ ਕਾਲੀਆ ਨੇ ਇਸ ਸੀਜ਼ਨ ’ਚ ਵੀ ਕੁਦਰਤੀ ਖੇਤੀ ਰਾਹੀਂ ਛੋਲੇ ਦੀ ਫਸਲ ਉਗਾ ਕੇ ਵਧੀਆ ਪੈਦਾਵਾਰ ਹਾਸਲ ਕੀਤੀ ਹੈ ਅਤੇ ਹੋਰ ਕਿਸਾਨਾਂ ਲਈ ਇੱਕ ਮਿਸਾਲ ਕਾਇਮ ਕੀਤੀ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਇਸ ਵਾਰ ਉਨ੍ਹਾਂ ਨੇ ਕਣਕ ਦੇ ਨਾਲ-ਨਾਲ ਛੋਲੇ ਦੀ ਬਿਜਾਈ ਵੀ ਕੀਤੀ ਸੀ। ਉਹ ਆਪਣੇ ਖੇਤਾਂ ’ਚ ਕਿਸੇ ਵੀ ਤਰ੍ਹਾਂ ਦੀ ਰਸਾਇਣਕ ਖਾਦ ਜਾਂ ਕੀਟਨਾਸ਼ਕ ਦੀ ਵਰਤੋਂ ਨਹੀਂ ਕਰਦੇ। ਇਸ ਵਾਰ ਉਨ੍ਹਾਂ ਨੂੰ ਕਣਕ ਦੇ ਨਾਲ ਕਰੀਬ 75 ਕਿੱਲੋ ਛੋਲਿਆਂ ਦੀ ਪੈਦਾਵਾਰ ਵੀ ਹੋਈ ਹੈ। ਇਸ ਦੀ ਕੁਆਲਿਟੀ ਬਹੁਤ ਹੀ ਵਧੀਆ ਹੈ।ਇਸ ਤੋਂ ਪਹਿਲਾਂ ਲਲਿਤ ਕਾਲੀਆ ਨੇ ਕੁਦਰਤੀ ਖੇਤੀ ਰਾਹੀਂ ਸਿਰਫ਼ 18 ਮਰਲੇ ਜ਼ਮੀਨ ‘ਤੇ ਗੰਨਾ ਬੀਜ ਕੇ ਪਹਿਲੇ ਹੀ ਸੀਜ਼ਨ ਵਿੱਚ ਲਗਭਗ 70 ਕਿਲੋਗ੍ਰਾਮ ਸ਼ੱਕਰ ਤਿਆਰ ਕੀਤੀ ਸੀ। ਉਹ ਪੁਰਾਣੇ ਦੇਸੀ ਬੀਜਾਂ ਦੀ ਸੰਭਾਲ ਵੀ ਕਰ ਰਹੇ ਹਨ। ਉਨ੍ਹਾਂ ਨੇ ਆਪਣੇ ਘਰ ਵਿੱਚ ਹੀ ਕਣਕ ਅਤੇ ਮੱਕੀ ਦੇ ਨਾਲ-ਨਾਲ ਕਈ ਰਵਾਇਤੀ ਮੋਟੇ ਅਨਾਜ, ਦਾਲਾਂ, ਤੇਲਬੀਜ ਫ਼ਸਲਾਂ ਅਤੇ ਸਬਜ਼ੀਆਂ ਦੇ ਪੁਰਾਤਨ ਦੇਸੀ ਬੀਜਾਂ ਦਾ ਵਧੀਆ ਬੀਜ ਬੈਂਕ ਤਿਆਰ ਕੀਤਾ ਹੋਇਆ ਹੈ।ਉਨ੍ਹਾਂ ਕੋਲ ਕਣਕ ਦੀਆਂ ਅੱਠ ਕਿਸਮਾਂ ਦੇ ਦੇਸੀ ਬੀਜ ਮੌਜੂਦ ਹਨ। ਮੱਕੀ ਅਤੇ ਜੌਂ ਦੀਆਂ ਦੇਸੀ ਕਿਸਮਾਂ ਵੀ ਉਨ੍ਹਾਂ ਨੇ ਸੰਭਾਲ ਕੇ ਰੱਖੀਆਂ ਹਨ, ਜੋ ਪੌਸ਼ਟਿਕ ਗੁਣਾਂ ਨਾਲ ਭਰਪੂਰ ਹਨ ਅਤੇ ਘੱਟ ਬਾਰਿਸ਼ ਵਿੱਚ ਵੀ ਚੰਗੀ ਪੈਦਾਵਾਰ ਦਿੰਦੀਆਂ ਹਨ। ਕਈ ਰਵਾਇਤੀ ਅਤੇ ਲੁਪਤ ਹੋ ਰਹੀਆਂ ਮੋਟੇ ਅਨਾਜ ਦੀਆਂ ਫਸਲਾਂ ਜਿਵੇਂ ਮੰਢਲ, ਕੋਦਰਾ, ਕੰਗਣੀ ਅਤੇ ਬਾਜਰੇ ਦੇ ਬੀਜ ਵੀ ਉਨ੍ਹਾਂ  ਦੇ ਬੀਜ ਬੈਂਕ ਵਿੱਚ ਮਿਲ ਜਾਂਦੇ ਹਨ। ਸਰ੍ਹੋਂ ਅਤੇ ਤਿਲ ਦੀਆਂ ਕਈ ਪੁਰਾਣੀਆਂ ਕਿਸਮਾਂ, ਦਾਲਾਂ ਵਿੱਚ ਕੁਲਥ, ਰੂੰਗੀ, ਮਾਂਹ ਅਤੇ ਛੋਲੇ ਦੇ ਦੇਸੀ ਬੀਜ ਵੀ ਇਸ ਬੀਜ ਬੈਂਕ ਵਿੱਚ ਮੌਜੂਦ ਹਨ। ਉਨ੍ਹਾਂ ਕੋਲ ਲਸਣ, ਪਿਆਜ਼, ਭਿੰਡੀ, ਘੀਆ, ਕੱਦੂ, ਰਾਮਾਤੋਰੀ, ਧਨੀਆ, ਮੇਥੀ ਅਤੇ ਹੋਰ ਫ਼ਸਲਾਂ ਦੇ ਪੁਰਾਣੇ ਅਤੇ ਦੁਰਲੱਭ ਬੀਜ ਵੀ ਉਪਲਬਧ ਹਨ।