'ਸੈਮੀਕਨ ਇੰਡੀਆ 2026' ਦਾ ਭਲਕੇ ਉਦਘਾਟਨ ਕਰਨਗੇ ਪ੍ਰਧਾਨ ਮੰਤਰੀ ਮੋਦੀ

ਨਵੀਂ ਦਿੱਲੀ, 16 ਸਤੰਬਰ (ਹਿੰ.ਸ.) : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀਰਵਾਰ ਸਵੇਰੇ 10 ਵਜੇ ਨਵੀਂ ਦਿੱਲੀ ਦੇ ਯਸ਼ੋਭੂਮੀ ਵਿਖੇ ਤਿੰਨ ਦਿਨਾਂ ਅੰਤਰਰਾਸ਼ਟਰੀ ਸੰਮੇਲਨ ਅਤੇ ਪ੍ਰਦਰਸ਼ਨੀ ‘ਸੈਮੀਕੌਨ ਇੰਡੀਆ 2026’ ਦਾ ਉਦਘਾਟਨ ਕਰਨਗੇ ਅਤੇ ਇਕੱਠ ਨੂੰ ਸੰਬੋਧਨ ਵੀ ਕਰਨਗੇ। 17 ਤੋਂ 19 ਸਤੰਬਰ ਤੱਕ ਹੋਣ ਵਾਲੇ ਸੰਮੇਲਨ ਦਾ ਵਿਸ਼ਾ ‘ਸਿਲੀਕਾਨ ਟੂ ਸਿਸਟਮ: ਬਿਲਡਿੰਗ ਦਿ ਈਕੋਸਿਸਟਮ’ ਹੈ। ਪ੍ਰਧਾਨ ਮੰਤਰੀ ਦਫ਼ਤਰ ਅਨੁਸਾਰ ਸੰਮੇਲਨ ਵਿੱਚ ਸੈਮੀਕੰਡਕਟਰ ਅਤੇ ਇਲੈਕਟ੍ਰੋਨਿਕਸ ਮੁੱਲ ਲੜੀ ਨਾਲ ਜੁੜੀਆਂ ਭਾਰਤੀ ਅਤੇ ਗਲੋਬਲ ਕੰਪਨੀਆਂ, ਨੀਤੀ ਨਿਰਮਾਤਾ, ਨਿਵੇਸ਼ਕ, ਖੋਜਕਰਤਾ, ਸਟਾਰਟਅੱਪ, ਅਕਾਦਮਿਕ ਸੰਸਥਾਵਾਂ ਅਤੇ ਵਿਦਿਆਰਥੀ ਹਿੱਸਾ ਲੈਣਗੇ। ਇਸ ਦਾ ਉਦੇਸ਼ ਭਾਰਤ ਵਿੱਚ ਸਹਿਯੋਗ, ਨਿਵੇਸ਼ ਅਤੇ ਨਵੀਨਤਾ ਨੂੰ ਉਤਸ਼ਾਹਿਤ ਕਰਨ ਦੇ ਨਾਲ ਸੈਮੀਕੰਡਕਟਰ ਖੇਤਰ ਲਈ ਹੁਨਰਮੰਦ ਕਾਰਜਬਲ ਤਿਆਰ ਕਰਨਾ ਹੈ। ਸੰਮੇਲਨ ਵਿੱਚ ਸੈਮੀਕੰਡਕਟਰ ਅਤੇ ਡਿਸਪਲੇ ਉਦਯੋਗ ਦੀਆਂ ਤਕਨੀਕੀ ਤਰੱਕੀਆਂ ਬਾਰੇ ਸਮਾਨਾਂਤਰ ਸੈਸ਼ਨ ਹੋਣਗੇ। ਰਣਨੀਤਕ ਭਾਈਵਾਲੀਆਂ ਅਤੇ ਸਾਂਝੇ ਉੱਦਮਾਂ ਨੂੰ ਉਤਸ਼ਾਹਿਤ ਕਰਨ ਲਈ ਛੇ ਦੇਸ਼ਾਂ ਵਿੱਚ ਗੋਲਮੇਜ਼ ਬੈਠਕਾਂ ਵੀ ਕਰਵਾਈਆਂ ਜਾਣਗੀਆਂ। ਇਸ ਤੋਂ ਇਲਾਵਾ ਔਰਤਾਂ ਦੀ ਅਗਵਾਈ ’ਤੇ ਵਿਸ਼ੇਸ਼ ਸੈਸ਼ਨ ਹੋਵੇਗਾ। ਪ੍ਰਦਰਸ਼ਨੀ ਵਿੱਚ ਸੈਮੀਕੰਡਕਟਰ ਮੁੱਲ ਲੜੀ ਦੇ ਸਾਰੇ ਪ੍ਰਮੁੱਖ ਪੜਾਵਾਂ ਨੂੰ ਦਰਸਾਇਆ ਜਾਵੇਗਾ। ਇਸ ਵਿੱਚ ਸੈਮੀਕੰਡਕਟਰ ਸਮੱਗਰੀ ਅਤੇ ਉਪਕਰਣਾਂ ਤੋਂ ਲੈ ਕੇ ਚਿੱਪ ਡਿਜ਼ਾਈਨ, ਨਿਰਮਾਣ, ਉੱਨਤ ਪੈਕੇਜਿੰਗ, ਇਲੈਕਟ੍ਰੋਨਿਕਸ ਅਤੇ ਏਕੀਕ੍ਰਿਤ ਪ੍ਰਣਾਲੀਆਂ ਤੱਕ ਦੀ ਪੂਰੀ ਪ੍ਰਕਿਰਿਆ ਸ਼ਾਮਲ ਹੋਵੇਗੀ। ਇਸ ਲਈ ‘ਸੈਂਡ ਟੂ ਸਿਲੀਕਾਨ ਟੂ ਸਿਸਟਮਜ਼’ ਵੈਲਯੂ ਚੇਨ ਅਨੁਭਵ ਕੇਂਦਰ ਵੀ ਸਥਾਪਿਤ ਕੀਤਾ ਗਿਆ ਹੈ। ਪ੍ਰਬੰਧਕਾਂ ਮੁਤਾਬਕ ਸੰਮੇਲਨ ਵਿੱਚ 52 ਦੇਸ਼ਾਂ ਦੀਆਂ 600 ਤੋਂ ਵੱਧ ਕੰਪਨੀਆਂ ਹਿੱਸਾ ਲੈਣਗੀਆਂ ਅਤੇ ਕਰੀਬ 50,000 ਦਰਸ਼ਕਾਂ ਦੇ ਪਹੁੰਚਣ ਦੀ ਉਮੀਦ ਹੈ। ਇਸ ਦੌਰਾਨ 400 ਤੋਂ ਵੱਧ ਉੱਚ ਅਧਿਕਾਰੀ ਅਤੇ 150 ਤੋਂ ਵੱਧ ਬੁਲਾਰੇ ਵੱਖ-ਵੱਖ ਤਕਨੀਕੀ ਅਤੇ ਰਣਨੀਤਕ ਸੈਸ਼ਨਾਂ ਵਿੱਚ ਵਿਚਾਰ ਸਾਂਝੇ ਕਰਨਗੇ। ਪ੍ਰਦਰਸ਼ਨੀ ਵਿੱਚ ਜਪਾਨ, ਦੱਖਣੀ ਕੋਰੀਆ, ਮਲੇਸ਼ੀਆ, ਨੀਦਰਲੈਂਡ, ਸਿੰਗਾਪੁਰ ਅਤੇ ਸਵੀਡਨ ਦੇ ਸਮਰਪਿਤ ਕੰਟਰੀ ਪੈਵੇਲੀਅਨ ਹੋਣਗੇ। ਇਸ ਦੇ ਨਾਲ 12 ਰਾਜਾਂ ਦੇ ਬੂਥ, ਸਟਾਰਟਅੱਪ ਪੈਵੇਲੀਅਨ, ਨਵੀਨਤਾ ਪ੍ਰਦਰਸ਼ਨੀ, ਵਿਦਿਆਰਥੀ ਹੈਕਾਥੌਨ ਅਤੇ ਕਾਰਜਬਲ ਵਿਕਾਸ ਪੈਵੇਲੀਅਨ ਵੀ ਆਕਰਸ਼ਣ ਦਾ ਕੇਂਦਰ ਰਹਿਣਗੇ।